ابقي طمنى انت إيه قرارك

انا كان عندي وقت فاضي بين المحاضرات فقلت اعدي على المعهد لأني اعرف انه جنب كليتي و لو انت من اسكندرية يبقى اكيد انت عارف بس انا عمري ما شفته المهم دوخت عليه و قعدت اسأل و لقيت بالصدفة ورا ملعب كلية الهندسة مبنى مكتوب عليه وزارة التعليم العالي الكلية التكنولوجية ففهمت انه هو بس بيدلعوه و يدولو لقب كلية.المبنى بتاع المعهد معقول و حلو و شكله جديد بس طبعا العيال اللي خارجين من المعهد شكلهم بيئة بس مش كلهم يعني بس معظمهم لأن نسبة كبيرة منهم صنايع مش ثانوي عام بس مش معنى كده ان بتوع الصنايع كلهم بيئة.المهم و دخلت و سألت الضابط و العسكري اللي واقف قولتله عايز اسأل على حاجة في شئون الطلبة قالي اسألني قولتله لسه في تقديم في المعهد قالي ايه ده الناس كلها قدمت قولتله لا انا عايز احول قالي منين قولتله من كلية قالي كلية ايه قولتله علوم .. طبعا العسكري بارد و فضولي.المهم قولتله كلية علوم فاستعجب و قالي من كلية لمعهد؟طبعا هو ميعرفش الموضوع مش هينفع اقعد اشرحله.المهم قولتله يعني ينفع احول ولا لأ قالي خلاص تعالى بكرة الصبح و رحت ماشي.هو اصلا المعروف ان اتحويل بين الكليات الغير متناظرة في نفس الجامعة بيبقى لغاية شهر من بداية الدراسة يعني لغاية عشرين اكتوبر. بس انا لسه مقررتش و متضايق اوي. ساعات دماغي تقولي ياعم انت شوفت المعهد ده شكل الطلبة بتوعه بيئة و هقعد سنتين فيه طب ما اخلص علوم في اربع سنين و خلاص بقى. و ساعات تانية لما بروح المبنى اللي فيه السكاشن بتاعت العلوم المبنى ده جنبه على طول كلية الهندسة فلما بشوف المبنى و الطلبة اللي طالعين منها بحزن على نفسي لأني عارف اني برغم مجموعي اللي مجابش هندسة الا اني حاسس اني جدير باني ادرس هندسة و ابقى مهندس فوق كل ده دي حلم معظم الطلبة و انا منهم.و زي ما بتأثر اوي لما بعدي على كلية الهندسة.برضه لما بعدي على المجمع الطبي اللي فيه كل كليات الطب و الاسنان و الصيدلة و اشوف الطلبة بالبالطو برغم اننا احنا برضه بنلبس بلطوا في المعامل لما بشوف برضه المشهد ده بحزن اوي و بصعب على نفسي.و فكرت اني اعيد الثانوية العامة عشان ادخل كلية الطب مع اني عمري ما فكرت اني ادخل طب غير الايام دي.بس لقيت انه ممنوع حد يعيد الثانوية العامة يعني مستحيل ادخل كلية الطب فزعلت جدا لأن الواحد لما يعرف ان في باب اتقفل في وشه نهائيا بيجيله اكتئاب.فجيت للهندسة قولت برضه مش هينفع اعيد الثانوية العامة ففي ناس قالولي على موضوع المعهد ده مش عارف اشكرهم ولا اخنقهم.هي دي كل الحكاية انا بجد جوايا ما يسمى صراع داخلي زائد اني عندي شوية اكتئاب و خيبة امل. ده حتى كلية الدفاع الجوي لما عرفت انها بتدي بكالريوس هندسة شعبة اتصالات من كلية الهندسة جامعة الاسكندرية قلت اقدم عسكرية بس لقيت في الشروط للكلية دي ان يكون الطالب حاصل على 70% من درجة الرياضيات2 يعني 35 و انا لحظي المهبب و الامتحانات التعجيزية انا جايب 69% من درجة الرياضيات 2 يعني 34,5. فمقدمتش فيها. انا صليت استخارة بس للاسف انا لسه في حيرة و اللي بيجيبله سيرة الموضوع ده مش بيقدر الحالة اللي انا فيها وبيقعد يقولي لا و انت ازاي تفكر في كده.